MANIFIESTU de Iniciativa Internacionalista
 
Tamos asistiendu a la mayor crisis del capitalismu nos cabeiros ochenta años, y outra vuelta los gobiernos de la Xunión Europea quieren que paguen las súas consecuencias los trabayadores y los seutores populares. En toda Europa, los despidos, los espedientes de regulación d'emplegu y la non renovación de contratos tan tornándose cada día nel drama de millones de personas condergadas al paru, al desahuciu y a la miseria. 

Los gobiernos europeos arrampuñan l'erariu públicu p'arrescatar a los banqueiros y sofitar a las grandes empresas, demientras el desemplegu medra ensín aparar. Yia la Europa de las privatizaciones, del Plan Boloña pa mercantilizar l'ensiñu superior, de la Direutiva Bolkenstein ou de la Direutiva del Retornu escontra de los trabayadores inmigrantes, que-y da aliendu a la xenofobia y al racismu. 

La crisis d'anguañu, comu nun podía ser d'outra miente, amás de las súas consecuencias económicas y sociales, ta faciendu espoxigar tresformaciones políticas mui importantes, que van ser más fondas nun futuru prósimu. 

Nel casu del Estáu español, la crisis, la global y la propia, tan contribuyendu a dexar definitivamente albentestate los desdexos del Gobiernu de Rodríguez Zapatero y del réxime borbónicu surdíu del nomáu procesu de "transición": corrupción xeneralizada, usu de la represión llegal ou illegal comu xeitu emplegáu pa facer davezu frente a los conflictos sociales y políticos conos seutores populares, precariedá de los servicios sociales, colapsu de los sistemas educativos... 

De xeitu mui especial, remanecen las pergraves torgas democráticas d'un réxime nel que'l Xefe d'Estáu, Juan Carlos I, foi impuestu por Franco, réxime que, acordias con esta situación llaceriosa, yia incapaz d'ellaborar una llei de la memoria histórica que reconoza la rialidá de la resistencia antifacista de los nuesos pueblos.
 
Esiste una corriente involucionista, neofacista, entamada por seutores poderosos del capitalismu español y la súa rede institucional y mediática, que tien dúas caras: la "moderna", de la que yia la espresión más significativa la UpyD, y la "tradicional", que tien comu punta de llanza a la Conferencia Episcopal Española. Esta corriente involucionista, conas súas estremadas espresiones, yia la que nesti intre ta orientandu la estratexa de fondu del bloque dominante español, incluyíu'l Gobiernu l'Estáu. Una estratexa que se materializa, ente outras cousas, na xuntanza PP-PSOE p'algamar el gobiernu vascongáu con un oxetivu claru: la españolización d'esi territoriu. 

Del outru llau tamos las fuercias soberanistas ya independentistas d'esquierdas, las fuercias políticas de la esquierda estatal respetuosas conos drechos nacionales de los dixebraos pueblos oprimíos pol Estáu español, asina comu importantes movimientos sociales y sindicales, ente los que destacan el movimientu antifacista; el movimientu escontra la privatización de la sanidá, la educación y los servicios públicos; las lluitas obreiras escontra los EREs y despidos; la lluita de los estudiantes escontra'l Plan Boloña; los movimientos de muyeres... Al tiempu, dalgunos d'estos movimientos sociales tienen una importante articulación nacional-popular, de xeitu más fondu nos pueblos nos que'l procesu políticu soberanista ta más avanzáu. 

Abúltanos qu'esiste capacidá asgaya comu pa orientar con un sentir anticapitalista y democráticu esi deséu, cada vuelta más espardíu, de cambéu radical, anque anguañu esta capacidá tienga un desendolcu desigual nas nuesas respeutivas naciones. 

Entamandu con esta valoración, impulsamos esti manifitestu, que tien las siguientes exes básicas: 

* Xusticia social. Que la crisis la paguen quienes la provocaron: los capitalistas. El capitalismu español tien unas carauterísticas especialmente agresivas, comu la fonda precariedá llaboral, causa de la mayor tasa de paru y d'emplegu eventual de la X.E. Y agora l'enfotu del sistema yia dar una vuelta de tuerca más no que cinca a la esplotación y a los recortes sociales. La xente que sofitamos esti manifiestu garramos el compromisu de puxar pola movilización pa parar estos despropósitos, desixendu un plan de rescate de los trabayadores, ensin medrana a proponer pa ello mididas anticapitalistas. 

* Llibertáes democráticas plenas. Tamos comprobandu comu, pasu ente pasu, van recortándose, inda más, los llimitaos dreitos civiles esistentes, comu'l dreitu a la non discriminación por razones ideolóxicas, de llingua y cultura, d'edá ou de xéneru. El dreitu a la llibre espresión, el dreitu a nun ser represaliáu, torturáu o procesáu polas ideas propias. El dreitu a votar y ser votáu. L'Estáu español nun respeta la soberanía de las estremadas naciones que caltién na sua xurisdicción nin del conxuntu de pueblos. Esiste un entramáu xurídico-políticu creyáu na transición que tornóu al Estáu nuna cárcele de pueblos y xentes, asina comu nun pozu de corrupción.

* Non a la discriminación de xéneru. Peru non comu un enunciáu formal y vaciu de conteníu, sinon comu una desixencia normativa, xurídica y práutica que faiga posible'l fin de la discriminación. Estu inclúi, ente outras cousas, el dreitu y la posibilidá rial de control de las muyeres sobre'l sou propiu cuerpu, la súa sexualidá y la súa capacidá reproductiva. 

* Dreitos políticos. Reivindicamos los dreitos negaos pol réxime d'anguañu, ente los qu'hai de sorrayar el dreitu de tolos pueblos a decidir de mou soberanu'l sou futuru, y non comu un feitu aislláu, sinon comu un dreitu permanente, yia dicir, el dreitu d'autodetermín. El dreitu de cada pueblu a decidir la súa forma de gobiernu y a la normalización de la súa llingua y cultura nacionales. 

* Escontra la Europa del capital. Tamos a la escontra de la Europa del capital y a favor de la Europa de los pueblos. Tamos a la escontra de la OTAN comu espresión militar del imperialismu, poro, desiximos la retirada del Estáu español d'esta alianza militar. Tamos a la escontra de la especulación y l'esfarrape del mediu ambiente. Tamos pola defensa de la soberanía alimentaria y de lu coleutivu frente lu priváu. 
 
Sofitamos los procesos soberanistas que s'entaman a nivel européu, y, al tiempu, espresamos la nuesa solidariedá pa conos procesos d'articulación patrióticos, antiimperialistas y de xusticia social que se tan desendolcandu en Llatinoamérica, asina comu pa conos frentes de resistencia n'Oriente Mediu, y de xeitu mui especial, cona heroica lluita del pueblu Palestín. Dende una fonda vocación internacionaliega, sofitamos las lluitas de tolos pueblos del mundu pola súa llibertá y la súa dignidá. 

Comisión promotora de la candidatura a Parlamentu Européu "Iniciativa Internacionalista" 
 
15 d'abril de 2009